L'uffizi da stadi civil documentescha las naschentschas da tuot ils uffants chi naschan in sia regiun. Las naschentschas sun d'annunzchar infra 3 dis à l'uffizi da stadi civil.
Las naschentschas ils ospidals da Scuol e da la Val Müstair vegnan annunzchadas directamaing tras l'administraziun da l'ospidal a l'uffizi da stadi civil.
Las naschentschas da chasa ston gnir annunzchadas in prüma lingia da la hebamma. Uschigliö es mincha otra chi'd es preschainta pro la naschentscha obain la mamma da l'uffant respunsabla per l'annunzcha.
Prenom
Scha'ls genituors sun maridats ün cun l'oter fixeschan els ils prenoms da l'uffant; sch'els nu sun maridats, fixescha la mamma ils prenoms scha'ls genituors nu sun respunsabels insembel per la chüra genituoriala. Prenoms chi violeschan evidaintamaing ils interess da l'uffant vegnan refüsats.
Nom da famiglia
Scha'ls genituors sun maridats ün cun l'oter e portan ün nom da famiglia cumünaivel survain l'uffant quel nom famiglia. Scha'ls genituors sun maridats ün cun l'oter e sch'els mainan differents noms da famiglia, survain l'uffant quel da lur noms da nubil, ch'els han fixà a chaschun da la maridaglia sco nom da lur uffants cumünabels. Scha'ls genituors nu sun maridats ün cun l'oter survain l'uffant il nom da nubil da la mamma. Scha la chüra genituoriala es chosa da tuots duos genituors, definischan els pro'l prüm uffant cumünaivel il nom da nubil da la mamma obain quel dal bap sco nom da famiglia da l'uffant. Il nom da nubil tschernü vala lura per tuot ils ulteriurs uffants cumünabels.
Attest da naschentscha / attest da famiglia
I nu vain miss oura automaticamaing ün certificat da naschentscha per l'uffant. Ün documaint da naschentscha obain ün extrat internaziunal dal register da naschentscha CIEC (plurilinguistic) po gnir postà per telefon o per e-mail. La spediziun vegn fatta cun ün quint.
Ils cudeschs da famiglia obain ils certificats da famiglia chi sun fingià avant man pon gnir actualisats e rimplazzats sainza taxas.