Process regiunals
Il svilupp regiunal surpiglia üna funcziun da coordinaziun pels process chi s‘occupan da temas cun ün’importanza regiunala.
Cultivaziun coordinada la l’aua
Il proget „Integrales Einzugsgebietsmanagement (IEM) Inn / Rom“ ha sco böt principal la cultivaziun da la resursa d’aua in ün möd coordinà e persistent. La cumischiun IEM cun rapreschantants da tuot ils cumüns e cun perits as inscuntra regularmaing e sgüra quatras la realisaziun da masüras cumünaivlas. Il svilup regiunal coordinescha la cumischiun IEM. La planisaziun da masüras es cuntgnüda ill’ analisa da situaziun IEM da l’on 2019 e vegn atualisada continuadamaing.
Svilup dal reservat da biosfera da l‘UNESCO e dal parc da natüra
Che pussibilitats concretas sun avantman per sviluppar inavant il Parc da natüra Biosfera Val Müstair e’l reservat da biosfera da l’UNESCO Engiadina Val Müstair per pudair trar a nüz optimalmaing lur potenzial? Quista dumonda principala vegn elavurada acutalmaing suot l'instituziun portadra, la Regiun EBVM. Dürant la perioda tanter ils ons 2019 e 2022 es gnü examinà il proget concret d'extender il parc da natüra Biosfera chi exista illa Val Müstair ed il reservat da biosfera Engiadina Val Müstair süls territoris cumünals da Scuol e Valsot. Davo la fin da la fasa d'examinaziun es la decisiun da na extender il proget illa "fasa d'installaziun resp. d'ingrondimaint" chi'd es pervisa per la fundaziun resp. per l'ulteriur svilup da parcs da natüra tenor il proceder standartisà. Impè da quai vegnan las cungnuoschentschas chi sun avant man transferidas in ün prossem pass in structuras d'organisaziun existentas sco eir in progets operativs. La visiun da sviluppar inavant cumünaivel il parc da natüra, il reservat da bisofera da l'UNESCO ed il Parc Naziunal Svizzer vegn cun quai mantgnüda inavant dals partenaris dal proget.
Stüdi da realisabilità UNESCO/parc da natüra (2019)
Rapport fasa da proget 2 UNESCO/parc da natüra (2022)
Digitalisaziun e ‚Ultrahochbreitband‘
Seguond Agenda 2030 promuova la regiun EBVM la digitalisaziun sco mez pel svilup regiunal. Per quai e l’access da la regiun a l’infrastructura „Ultrahochbreitband“ üna cundiziun indispensabla. Il Chantun Grischun sustegna regiuns chi planiseschan e realiseschan infrastructuras pel access al „Ultrahochbreitband“ in ün möd coordinà. Seguond incumbenza da la conferenza dals presidents elavurescha ün team regiunal actualmaing ün concept d’access pella regiun EBVM. Il team regiunal unischa rapreschantants da la politica, economia e mansteranza sco eir proprietaris d’infrastructura/impraisas electricas e vegn coordinà dal svilup regiunal.
Inscunter da la rait cultura illa regiun EBVM
La diversità culturala determinescha in möd decisiv l’identità regiunala ed es üna valur centrala pel svilup da la regiun EBVM. Co valütisaina plü bain cultura e lavur culturala in nossa regiun? Per discutar quista dumonda invidan il svilup regiunal da la regiun EBVM ed il Parc da natüra Biosfera Val Müstair insembel annualmaing a l’inscunter da la rait cultura illa regiun EBVM. L’inscunter spordscha üna plattafuorma a persunas ed instituziuns activas sül chomp cultural per far la cugnuschentscha tanter d’els, per barattar ideas sco eir per trar a nüz potenzials da coordinaziun e cooperaziun. Il prossem inscunter ha lö als 23.04.2024 (infuormaziuns detagliadas seguan).
Inscunter da la rait culturala illa regiun EBVM 2021
Inscunter da la rait culturala illa regiun EBVM 2022
Inscunter da la rait culturala illa regiun EBVM 2023
Scumpart rait da cultura Regiun EBVM
Attractività dal lö da la regiun EBVM per persunas giuvnas creschüdas
Chi resta, chi tuorna, chi vegn prò? O dumondà oter: che motivescha a persunas giuvnas creschüdas da 18 fin 40 ons da viver illa regiun Engiadina Bassa/Val Müstair? Ed ingiò daja pussibiltads per augmentar l'attractività da la regiun per quista gruppa in mera? Sün incumbenza dal svilup regiunal EBVM ha la scienzada sociala Sophia Völksen, chi abita a Scuol, examinà quistas dumondas. Las respostas e las racumondaziuns d'agir sun avant man i'l stüdi "La regiun Engiadina Bassa/Val Müstair sco spazi da viver e da lavurar per persunas giuvnas creschüdas" (2022). Las incugnuoschentschas e las racumondaziuns vegnan elavuradas in progets ed introduceschan la strategia regiunala pel svilup da l'economia locala (agenda 2030) chi vegn actualisada l'on 2023.